പ്രണയിനി
എന്തേ വൈകുന്നു തോഴാ
എന് പ്രണയ സ്വപ്നങ്ങളില്
വര്ണങ്ങള് ചാലിക്കാന്
വൈകുന്നതെന്തു നീ തോഴാ
കാര്മുക ഞാണൊലിയെത്തുന്നതും കാത്ത്
കാതോര്ത്തിരിപ്പൂ ഞാനെന്നും
ഉതിരുമാദ്യുതിയിലെന് പീലിവിടര്ത്താടാന്
മോഹിച്ചു കഴിയുന്നു തോഴാ
അന്ധകാരത്തില് നിന് പദനിസ്വനം കേള്ക്കെ
തുടികൊട്ടുമെന്നുമെന്നുള്ളം
നിന്നില് കുതിരുവാന് നിന്നിലലിയുവാന്
എത്ര ദാഹിപ്പു ഞാന് തോഴാ
ആരെയും കൂട്ടില് തളച്ചിടും നിന് നേര്ക്ക്
ശാപങ്ങളെത്രയുതിരുമെന്നോ
അതിനുള്ളിലെന്നുമീ രാഗാര്ദ്രഹൃത്തുമായ്
പ്രണയിനി കുളിരുന്നു തോഴാ
ഇത്ര പരിഭവിച്ചീടുവാനെന്തേ എന്
മക്കള് തന് ചെയ്തികളാണോ
ആണ്ടിലെപ്പാതിയും വിരഹാതുരയായ് ഞാന്
നിന്നെ പ്രതീക്ഷിച്ചു തോഴാ
സര്വം പൊറുത്തു തുണയ്ക്കുന്ന ദേവാ നീ
മാപ്പേകി ജീവനം നല്കൂ
ഭക്തയായ് ദാസിയായ് അര്ച്ചന ചെയ്യാം ഞാന്
കണ്ണന്നു മീര പോല് തോഴാ
ഇതങ്ങു നിർത്താതെ ഒഴുകുകയാണല്ലോ ?
ReplyDeleteവളരെ നന്നായി.